2016 budget ng DND pinadadagdagan (Dahil sa terror threat)

BUNSOD nang banta ng terorismo, nagkaisa ang mga senador na dagdagan pa ang pondo ng Department of National Defense (DND) para sa taon 2016.

Sa budget deliberations sa Senado, kinuwestiyon ni Senate Minority Leader Juan Ponce Enrile kung sasapat ang P116.2 bilyon para bigyang seguridad ang bansa.

Labis aniyang nakababahala ang terorismo lalo’t isang Russian jet ang pinabagsak kamakalawa ng Turkey.

Sagot ni Senador Loren Legarda, chairman ng Senate Committee on Finance, hindi ito sapat kahit na may P250 million augmentation budget na nakapaloob sa kanyang committee report.

Sa panukala ni Enrile, dapat dagdagan pa ng P10 bilyon hanggang P20 bilyon ang pondo ng DND.

Bagama’t aprubado ang panukalang dagdag pondo sa DND, pag-aaralan muna ng mga senador kung saan huhugutin sa 2016 proposed national budget ang naturang halaga.