HATAW! D'yaryo ng Bayan hatawtabloid.com
TUTOK lang ngayong Sabado, 9:00 a.m. sa programang Gandang Ricky Reyes Todo Na Toh (GRR TNT) ng GMA News TV dahil mayroong isang espesyal na eskuwelahang itatampok na may mga espesyal na kursong handog tulad ng Aged Care, Disability Care, Child Care, at Community Service.
Sinumang magtapos sa Charlton Brown International College (CBIC) ay nakasisigurong makahahanap ng trabaho dahil ito’y kinikilala sa Pilipinas at accredited sa ibang panig ng mundo.
Magsasadya sa CHILDHAUS (bahay-tuluyan ng mga batang may malulubhang sakit) ang mga estudyante ng CBIC para ipadama ang kanilang pagmamahal, simpatiya, at taos-pusong pagtulong.
Ipakikita rin ni Mader Ricky Reyes ang Regold treatment na dinarayo sa lahat ng sangay ng Gandang Ricky Reyes Salon. Ilang modelo ang rarampa sa harap ng kamera na lubos na nasiyahan sa make over magic ng beauty guru na ang buhok ay nagkaroon ng bagong sigla, naging tuwid at makintab.
Darayo rin ang GRR TNT staff and crew sa set ng Mari Mar na may interbyu ang ating host-producer kina Megan Young at Tom Rodriguez.
Ang unang gumanap sa serye’y ang superstar ng Mexico na si Thalia. Sa seryeng salin-Pinoy ay sumikat si Marian Rivera. “Gagawin ko ang lahat para mapantayan ko kundi man mahigitan ang husay nina Thalia at Marian,” sabi ni Megan na umaming mas madali ang manalo sa Ms. World pageant kaysa umarte sa harap ng boob tube camera.
