Ginang sugatan sa taga ni bayaw

SUGATAN ang isang ginang makaraan tagain ng lasing niyang bayaw nang tumanggi ang biktima na makipag-inoman ang kanyang kinakasama sa suspek kahapon ng madaling-araw sa Malabon City.

Kinilala ang biktimang si Maiden Bolina, 44-anyos, residente ng C. Perez St., Brgy. Tonsuya ng nasabing lungsod.

Habang arestado ang suspek na si Nover Gualba, 34, nahaharap sa kasong frustrated homicide, alarm and scandal at paglabag sa BP6, gayondin ang kuya niyang si Nicanor, 43, nang mahulihan ng jungle bolo.

Sa ulat ni PO3 Jun Belbes, dakong 12:30 a.m. nang maganap ang insidente sa loob ng bahay ng biktima sa nasabing lugar.

Papatulog na si Bolina at live-in partner niyang si Nicanor nang dumating ang lasing na si Nover at pilit na niyaya ang kanyang kuya na makipag-inoman ngunit tumanggi ang biktima.

Bunsod nito, nagalit ang suspek at tinaga sa kamay ang biktima na mabilis na tumakbo at humingi ng tulong sa mga barangay tanod.

Nang aarestohin si Nover ay nahulihan din ang kuya niyang si Nicanor ng jungle bolo kaya kapwa sila dinala sa himpilan ng pulisya.

Rommel Sales