Katorse 3 beses ginahasa ng textmate

CAUAYAN CITY, Isabela – Pinaghahanap ng mga awtoridad ang isang 21-anyos magsasaka na sinampahan ng kasong rape in relation to Republic Act 7610 o Anti-Child Abuse Law, ng kanyang 14-anyos textmate.

Ang suspek na itinago sa pangalang Dencio ay residente ng isang barangay sa San Mariano, Isabela, habang ang biktima ay residente sa Alicia, Isabela.

Ayon kay SPO3 Laila Laureaga, hepe ng Children and Women Protection Desk ng Alicia Police Station, ang dalagita kasama ang kanyang lola ay nagreklamo hinggil sa tatlong beses na panggagahasa sa kanya ng suspek.

Inamin ng dalagitang itinago sa pangalang Kris, naging magkasintahan sila ni Dencio sa pamamagitan ng pagpapalitan ng text messages.

Nakilala niya si Dencio noong Hulyo 25, 2014 nang magtungo sa kapistahan ng kanilang barangay sa San Mariano, Isabela.

Ang nanay ni Kris ay isang overseas Filipino worker habang ang kanyang tatay ay magsasaka sa bayan ng San Mariano.

Ang kanyang lola ang madalas na kasama niya sa kanilang bahay.

Nangyari aniya ang pagsasamantala sa kanya ni Dencio nang magkakasunod na beses siyang bisitahin sa kanilang bahay sa bayan ng Alicia na nagsimula noong Nobyembre 18, 2014.

Hindi agad nagsumbong si Kris sa kanyang lola hinggil sa panggagahasa sa kanya ng kanyang textmate makaraan magbanta na sila ay papatayin.