Abueva Player of The week

ISANG dahilan kung bakit nangunguna ngayon ang Alaska Milk sa team standings ng PBA Philippine Cup ay ang mala-halimaw na laro ni Calvin Abueva.

Naging susi si Abueva sa dalawang sunod na panalo ng Aces kaya siya ang napili ng PBA Press Corps bilang Player of the Week para sa linggong Oktubre 27 hanggang Nobyembre 2.

Noong Martes ay naging bayani si Abueva sa 100-98 na panalo ng Alaska kontra Talk n Text dahil sa kanyang tira kasabay ng busina.

Nagtala siya ng 26 puntos at 22 rebounds sa larong iyon.

At noong Biyernes ay tumagal lang ng sampung minuto si Abueva kontra Meralco ngunit sapat ang kanyang sampung puntos, dalawang rebounds at isang agaw sa 105-64 na pagmasaker ng Aces kontra Bolts.

Naga-average si Abueva ng 19 puntos, 9.3 rebounds at 1.6 assists bawat laro kaya tabla ang Alaska sa San Miguel Beer sa liderato sa torneo na parehong may tatlong panalo at walang talo.

Maghaharap ang Aces at Beermen mamayang gabi.

(James Ty III)