Direk GB at Eric, sobra raw naging ‘close’

PARANG naka-shot ng tequila ang character actress na si Melissa Mendez sa nakaraang presscon ng Separados na idinirehe ni GB Sampedro at produced nila ni Alfred Vargas para sa 10th Cinemalaya Film Festival na magsisimula sa Agosto 2 hanggang 10 sa CCP main theater.

Sumobra kasi ang daldal ni Melissa ng mga oras na iyon nang tanungin siya kung lahat ng paghihiwalay sa asawa o dyowa ay masakit.

Iba’t ibang klase kasi ng relasyon ang kuwento ng pelikula at isa si Melissa sa tinanong tungkol sa mga nakaraan niya.

“Oo naman, lahat ng relasyon masakit, kasi bawat relasyong pinasok mo gusto mo maging forever, iyon lagi ang mindset mo. May pagkakataon talaga na hindi nagki-click hindi nagiging maayos.

“Nangyari kasi sa akin dati kay Raymond Quiano, kasi sobrang in-love na in-love kami with one another but we had to separate kasi I was pulling him up, he was pulling me down.

“So wala siyang foresight o plano sa buhay, parang masaya lang siya kung anong mayroon, kung saan lang siya ihagis ng hangin,” pagtatapat ni Melissa.

Isa pang natanong sa aktres ay ang dating bold actor na si JC Castro na naka-relasyon din ni Melissa kung nasaktan din siya at nagulat ang lahat sa sinabi ng aktres,”hindi kasi niloko niya ako, eh!.

“Pinaasa niya ako, sinabi niya sa national television na pakakasalan niya ako, ‘yun pala tatakbo siya bilang konsehal tapos pinagastos-gastos lang niya ako,” sabay tawanan ang lahat ng nasa presscon.

Hindi pa rin nagpaawat si Melissa at dinugtungan pa ng, ”sobra talaga (siya), siyempre dream na dream ko na makapag-asawa na ako at ang guwapo-guwapo ni JC, kasi ‘di ba, hunk na hunk siya, ang ganda ng puwet, ang ganda ng katawan,” tawanan ulit ang entertainment media.

At nalaman din naming ipininta pala ni Melissa ang butt ni JC dahil nga gandang-ganda siya sa hugis nito at naibenta raw niya nang maghiwalay sila.

Ayon naman kay direk GB halos related sa personal niyang buhay ang ilang kuwento sa pelikula maliban lang daw sa nagkaroon siya sa relasyon ng bading tulad ng ginagampanang papel ni Ricky Davao.

Pero hindi itinanggi ni direk GB na noong panahong depressed siya dahil sa lovelife ay si Erik Santos ang iniiyakan niya dahil nga bestfriend niya ang nasabing singer.

Kaya ang balik-tanong kay direk GB ay gaano sila ka-close ni Erik, ”sobrang close kami talaga,” walang malisyang sagot nito.