HATAW! D'yaryo ng Bayan hatawtabloid.com
PATAY ang isang lalaki makaraan saksakin ng mister ng kanyang kinakasama sa Valenzuela City kamakalawa ng madaling-araw.
Agad binawian ng buhay ang biktimang si Michael Limboc Evangelista, alyas Makol, 37, ng #880 A. De Castro St., Brgy. Malinta ng nasabing lungsod, sanhi ng pitong saksak sa iba’t ibang bahagi ng katawan.
Tinutugis ng mga awtoridad ang live-in partner niyang si Hanacel Castro at ang suspek na si Rudy Castro, mabilis na tumakas makaraan ang insidente.
Batay sa ulat ni SPO1 Ray Bragado, dakong 1 a.m. nang maganap ang insidente sa loob ng bahay ng biktima sa nasabing lugar.
Salaysay ng nakababatang kapatid ng biktima na si Jonaliza, narinig na lamang nila na sumisigaw ang kanyang kuya.Pagkaraan ay humingi ng tulong si Hanacel upang dalhin sa ospital si Evangelista.Agad tinungo ni Jonaliza ang kwarto ng biktima at nakitang duguan ang kanyang kuya. Sa pagsisiyasat ng mga tauhan ng Scene of the Crime Operatives (SOCO), nakuha ang mga illegal na droga sa kwarto ng biktima. (ROMMEL SALES)
