7-anyos nene utas sa boga ng senglot na tatay

PATAY ang 7-anyos batang babae nang aksidenteng mabaril ng kanyang ama sa Negros Occidental kamakalawa.

Hindi na umabot nang buhay sa Western Visayas Regional Hospital ang bata na tinamaan ng bala sa likod at tumagos sa kanyang kidney.

Sinampahan ng kasong illegal possession of firearms ang 44-anyos ama ng bata na hindi muna pinangalanan.

Batay sa ulat, naganap ang insidente sa Brgy. Inolingan, sa bayan ng Moises Padilla, sa naturang lalawigan.

Lasing na nakikipagtalo ang ama sa kanyang misis nang biglang kunin ang kanyang baril at ilang ulit na nagpaputok.

Sa kasamaang palad ay tinamaan ang kanyang anak.

Nakakulong na ngayon ang ama sa Moises Padilla Police Station.

(DANG GARCIA)