FIRING LINE
ni Robert B. Roque, Jr.
NOONG Sabado, sinabi ni Defense Secretary Gilberto Teodoro, Jr., sa ika-128 anibersaryo ng Philippine Military Academy (PMA) sa Baguio City na hindi dapat mag-atubili ang bansa sa pagpapalakas ng depensa. Aniya, bawat nagtapos sa PMA ay ituturing nang “mandirigma”, handang italaga sa tungkulin anumang oras.
Hindi ko alam kung gaano kalaki ang impluwensiya ng mapagmataas na pahayag ni Chinese Ambassador Jing Quan, na kumuwestiyon sa kakayahan ng Filipinas na ipagtanggol ang sarili. Pero malinaw ang nais ni Teodoro: pabilisin ang modernisasyon, pagandahin ang impraestruktura, at palawakin ang mga pasilidad sa pagsasanay.
Bilang Filipino, buong suporta ako rito. Bilang kolumnista, kailangan ko namang itapat ang adhikain sa realidad. Inililipat na ng Armed Forces of the Philippines (AFP) ang pokus mula sa panloob na seguridad tungo sa panlabas at multi-domain na depensa. Mahalaga ito dahil nasa estratehikong lokasyon tayo sa South China Sea, isang rutang pandagat na may malaking impluwensiya sa pandaigdigang ekonomiya at politika.
Nakakuha na tayo ng Jose Rizal-class frigate, Miguel Malvar-class corvette, at mas bagong offshore patrol vessel. Gayunman, ayon sa Department of National Defense (DND), kailangan ng ₱126.97 bilyon sa 2027 para sa modernisasyong saklaw ng Re-Horizon 3.
Ang iminungkahing pondo? ₱50 bilyon lamang. Idagdag ang lumalaking obligasyon sa pensiyon, mahinang kapasidad ng lokal na industriya, at kakulangan ng mga espesyalistang tauhan. Malinaw ang agwat sa pagitan ng pangangailangan at kakayahan.
Noong Biyernes, nagbanggaan sa himpapawid ang dalawang SF-260 trainer ng Philippine Air Force sa Fernando Air Base sa Lipa City, Batangas. Apat na piloto ang nasawi. Kasabay ng mga ambisyosong plano ni Teodoro, nakapagpapaisip ang trahedyang ito tungkol sa kahandaan at kakayahan ng ating militar.
Hindi sapat ang depensa sa himpapawid. Kailangan ng makabagong hukbo ang teknolohiya, mahusay na sistema, at bihasang sundalo. Nahuhuli tayo sa mga kapitbahay: bumibili ang Indonesia ng dose-dosenang Rafale fighter jet, gumagamit ng Gripen ang Thailand, at may mataas na kahandaang militar ang Singapore.
Aminado ang DND na nahuhuli tayo sa mga kapwa kasapi sa ASEAN. Kaya huwag basta magpaloko sa bersiyon ng lakas-militar ng Filipinas sa TikTok. Sa oras ng digmaan, mahalaga ang ating mga alyansa: ang Mutual Defense Treaty sa Estados Unidos, mga pasilidad ng EDCA, at lumalalim na ugnayan sa Japan at Canada.
Marami sa atin ang hindi matanggap ang pahayag ni Jing na “madaling manalo” ang Beijing kung gugustuhin nitong makipagdigma. Lalo pang umigting ang pagkadesmaya nang makipagpulong si Senador Robinhood Padilla sa embahador.
Pinahahalagahan ko ang paninindigan ni Teodoro sa pagtatanggol sa ating teritoryo. Ngunit hindi kailangang kamuhian ng mga Filipino ang mga kapitbahay, kabilang ang mga Tsino. Sa mundong magkakaugnay ang mga ekonomiya at suplay, mahalaga ang kapayapaan at paggalang sa isa’t isa.
Dapat magsilbi ang ating lakas sa pagtatanggol ng kapayapaan — hindi sa pagpapalit dito.
* * *
SHORT BURSTS. Para sa mga komento o reaksiyon, mag-email sa [email protected] o mag-post sa @Side_View sa X app (dating Twitter).
