TODO NA ang Team Pilipinas para sa malaking hamon sa 20th Asian Games at 5th Asian Para Games sa Aichi-Nagoya, Japan.
Mahigit 500 atleta ang binigyan ng send-off sa Rizal Memorial Coliseum, sa pangunguna ng Philippine Sports Commission (PSC), kasama ang Philippine Olympic Committee (POC) at Philippine Paralympic Committee (PPC).
Pinangunahan ni PSC Chairman Patrick Gregorio, kasama sina Commissioners Olivia “Bong” Coo, Matthew “Fritz” Gaston, Walter Torres at Edward Hayco, ang mga opisyal na sumuporta sa mga atletang kakatawan sa bansa.
Dumalo rin sina POC President Abraham “Bambol” Tolentino, PPC President Michael Barredo, Sen. Bong Go, at Rep. Richard Gomez.
Sa seremonya, inanunsyo ni Tolentino sina weightlifter Albert Ian Delos Santos at Olympic boxing medalist Aira Villegas bilang mga flag bearer ng Team Pilipinas sa opening ceremony sa Setyembre 19.
May dagdag ding P6,000 allowance ang mga atleta matapos itong ipahayag ni Gregorio, bilang dagdag-insentibo sa kampanya ng bansa na malampasan ang dating medalya nitong apat na ginto sa Asian Games at 10 ginto sa Asian Para Games.
Mauuna nang kumilos ang Gilas Pilipinas ngayong Biyernes, habang opisyal na sisiklab ang Asian Games ngayong Setyembre. Susundan naman ito ng Asian Para Games sa Oktubre 18. (PSC/HNT)
