HATAW! D'yaryo ng Bayan hatawtabloid.com
MATABIL
ni John Fontanilla
NAGDAGDAG ng panibagong mahalagang tagumpay sa kanilang karera sa musika ang singer-songwriter na si Nolo Lopez at recording artist na si Jos Garcia nang magwagi sila ng Collaboration of the Year sa katatapos na 17th PMPC Star Awards for Music para sa kanilang awiting Hanggang Dulo na isinulat niya at inawit nila ni Jos Garcia.
Ang pagkilala ay isang makabuluhang tagumpay para sa dalawang artista, na sa pamamagitan ng kanilang kolaborasyon ay naiparating ang mensaheng nagbibigay-inspirasyon sa mas malawak na madla.
Sa isang social media post pagkatapos magwagi sa 17th Star Awards for Music ibinahagi nito na kamakailan ay naisip niyang pansamantalang huminto sa pag-awit at pagsusulat ng mga kanta para pagtuunan ng pansin ang pagpapaunlad ng kanyang kompanya.
Gayunman, inilarawan niya ang natanggap na parangal bilang isang tugon sa kanyang panalangin at isang malinaw na hudyat upang ipagpatuloy ang kanyang pagmamahal at dedikasyon sa musika.
Nagpahayag din si Nolo ng taospusong pasasalamat kay Jos sa pagtanggap sa kanilang kolaborasyon, gayundin sa Philippine Movie Press Club (PMPC) sa ipinagkaloob na pagkilala.
Pinasalamatan din nito sina Atty. Patrick John Famillaran, ang Stardom Family, Inah Muñoz, at ang lahat ng kanilang mga tagasuporta na patuloy na umaalalay sa kanilang paglalakbay sa industriya ng musika.
Hindi naman napigilang hindi maluha ni Jos nang tanggapin nila ang karangalan at labis na nagpasalamat ito sa PMPC at sa Star Awards, sa kanyang pamilya, manager na si Atty. Patrick, kay Nolo, at sa Stardom Music Productions at sa mga taong patuloy na sumusuporta sa kanya.
