Tapos na sa pagmamarka ng mga ebidensiya
IMPEACHMENT COURT KASADO NA SA TRIAL NI VP SARA

ni NIÑO ACLAN

MATAPOS tiyakin na namarkahan na ang mga kinakailangang ebidensiya, tinapos na ng impeachment court ang pre-trial conference sa inihaing mga reklamo laban kay Vice President Sara Duterte at inaasahang handa na para sa gaganaping paglilitis sa 6 Hunyo 2026.

Nahaharap si Duterte sa mga kasong culpable violation of the Constitution, graft and corruption, betrayal of public trust, bribery, at iba pang mabibigat na krimen.

Noong Mayo, pinatalsik ang bise presidente ng Kamara sa ikalawang pagkakataon sa loob ng dalawang taon.

Apat na araw umabot ang ginanap na pre-trial conference na nagsimula noong Lunes, 22 Hunyo para markahan ang mga ebidensiya ng kampo ng depensa at prosekusyon.

Pinangunahan ang pre-trial conference ni Senate Secretary Atty. Renato Bantug na tumayong clerk of court para sa impeachment trial kasama ang ilang mga miyembro ng Senate Legal Division.

Sinabi ni defense team spokesperson Atty. Michael Poa na naging maayos ang pagmamarka sa mga exhibits o ebidensiya mula pa noong Miyerkoles, 24 Hunyo hanggang kahapon ng umaga, Huwebes, 25 Hunyo, sa kabila ng mga idinagdag na table o markings stations.

Maging si House prosecutor Rep. Terry Ridon ay nagsabi sa isang hiwalay na panayam kahapon, matatapos ang pagmamarka ng mga exhibits. Hindi na aniya aabot sa 1,000 dokumento ang natitira para sa markings.

Inaasahan na matutuloy na ang impeachment trial sa orihinal na takdang petsa nito sa darating na 6 Hulyo.

Sa magaganap na paglilitis ay hindi lamang makikita ng publiko kundi maririnig ang bawat ebidensiya ng magkabilang panig ganoon din ang mga tsetimonya ng mga testigo.

Kasado umano ang depensa sakaling kailanganing sumipot sa paglilitis si Duterte at kung hinihingi ng pagkakataon.

Hindi makadadalo bilang senator-judge si Senador Jinggoy Estrada dahil siya ay pinatawan ng 90-araw suspensiyon ng korte.

Gayondin si Senador Ronald “Bato” Dela Rosa dahil isa na siyang ‘pugante’ mula nang takasan ang warrant of arrest na inisyu ng International Criminal Court (ICC).