HATAW! D'yaryo ng Bayan hatawtabloid.com
BAYAMBANG, Pangasinan — Nakibahagi ang mga lider at boluntaryo ng FPJ Panday Bayanihan Party-List sa Brigada Eskwela 2026 sa tatlong pampublikong paaralan sa Bayambang, Pangasinan bilang bahagi ng paghahanda para sa nalalapit na pagbubukas ng klase.
Isinagawa ang mga aktibidad sa Bani Elementary School, Nalsian Elementary School, at Idong-Inanlorenza Elementary School kung saan nagtulungan ang mga boluntaryo, guro, magulang, at iba pang miyembro ng komunidad upang linisin at ayusin ang mga pasilidad ng paaralan para sa mga estudyante.
Pinuri ni FPJ Panday Bayanihan Party-List Representative Brian Poe ang mga boluntaryong naglaan ng oras at lakas upang makatulong sa mga paaralan at maisabuhay ang diwa ng bayanihan.
“Ang Brigada Eskwela ay patunay na ang edukasyon ng ating mga kabataan ay responsibilidad ng buong komunidad. Sa bawat silid-aralang nalilinis at sa bawat oras na inilalaan ng ating mga boluntaryo, mas napaghahandaan natin ang isang ligtas at maayos na kapaligiran para sa ating mga mag-aaral,” ani Poe.
Ayon kay Poe, mahalaga ang pakikilahok ng mamamayan upang matiyak na handa ang mga paaralan sa pagsalubong sa mga estudyante sa pagbubukas ng panibagong taong panuruan.
“Mas nagiging matatag ang ating mga komunidad kapag sama-sama tayong kumikilos para sa kapakanan ng susunod na henerasyon. Maraming salamat sa ating mga Ka-Panday, mga guro, magulang, at lahat ng nakiisa sa gawaing ito para sa ating mga kabataan,” dagdag niya.
Bahagi ang naturang aktibidad ng patuloy na adbokasiya ng FPJ Panday Bayanihan Party-List na isulong ang edukasyon, pagpapaunlad ng kabataan, at mga programang nakabatay sa malasakit at pakikilahok ng komunidad. (30)
