HATAW! D'yaryo ng Bayan hatawtabloid.com
BUKOD sa pagpapabuti ng kalagayan at karanasan ng mga nagtitinda at mamimili, nakatulong din ang redevelopment ng Iloilo Terminal at Central Markets para maging tourist attractions na naghihikayat sa mga celebrity at iba pang kilalang personalidad na bumisita, gaya ng mga sikat na pamilihan sa ibang bansa.
Pinakahuling bumisita rito ang aktres at social media personality na si BB Gandanghari, na dumaan sa Iloilo Terminal Market para maghapunan sa Betty’s BBQ kasama ang mga kaibigan sa kanyang bakasyon sa Iloilo City at Guimaras kamakailan.
Tinanggap ni Iloilo City Mayor Raisa Treñas si BB Gandanghari sa kanyang opisina, na nagbahagi ang aktres ng mga positibong komento tungkol sa lungsod at mga tourist attraction, tulad ng Esplanade, Sunset Boulevard, at Iloilo Business District.
“We are grateful to BB Gandanghari for promoting Iloilo City through her social media posts and for sharing her positive experiences with her followers,” wika ni Treñas.
Bilang pasasalamat, binigyan ni Treñas si BB Gandanghari ng kopya ng Gastronomy Book ng Iloilo City at isang Ilonggo-made hablon na sumasalamin sa mayamang kultura, kahusayan sa paglikha, at pamana ng Iloilo City.
Sa mga nakaraang taon, ilang kilalang personalidad na rin ang bumisita sa Iloilo Central at Terminal Markets, kabilang ang mga aktres na sina Jean Garcia, Arra San Agustin, at Jennica Garcia,gayundin ang award winning broadcast journalist na si Ces Oreña Drilon.
Napili ang Iloilo Terminal Public Market bilang isa sa mga pangunahing film location ng Kusinerang Bulag, na pinagbibidahan ng mag-inang Garcia at ni San Agustin.
Karamihan sa mga eksena ng pelikula ay kinunan sa Iloilo City, na ang kuwento ay batay sa buhay ng tatlong magkakapatid na babae na bumangon mula sa trahedya at mga pagsubok upang muling itayo ang kanilang restaurant, habang binibigyang-kahulugan ang katatagan, pagkakaisa, at pamana. Kabilang din sa pelikula sina Victor Neri, Samantha Samarita, at Madeleine Nicolas.
Samantala, pinuri ni Drilon ang partnership ng SM at Iloilo City Government sa redevelopment ng Terminal Market at Central Market. Aniya, isa itong matibay na halimbawa kung paano makapaghahatid ng makabuluhang resulta para sa komunidad ang pagtutulungan ng pribadong sektor at lokal na pamahalaan.
Ipinahayag din ng kilalang mamamahayag ang paghanga sa mga malaking pagbabago, kalinisan, at kaayusan ng mga pasilidad, na aniya’y sumasalamin sa matibay na political will at estratehikong paggamit ng puhunan mula sa pribadong sektor upang mapaganda ang mga pampublikong lugar.
Dagdag pa ni Drilon, nakatutulong ang redevelopment project upang higit pang mapahusay at maiangat ang mga pamilihan sa pamamagitan ng pagpapabuti sa karanasan ng mga bumibili at nagtitinda.
Sa ilalim ng administrasyon ni dating Mayor Jerry Treñas, pumasok ang Iloilo City LGU sa isang 25-year lease agreement sa SM Prime Holdings, na naglaan ng humigit-kumulang P3-B para sa Iloilo Central Market at Iloilo Terminal Market para gawing moderno ang mga pasilidad at maging malinis, ligtas, at episyenteng commercial hubs.
Ipinagpatuloy sa pamumuno ni Mayor Raisa Treñas, ang redeveloped markets ay mayroong humigit-kumulang 2,000 puwesto, na nagbibigay ng mas maayos na pasilidad para sa mga tindero at mas komportable at organisadong shopping experience para sa mga mamimili.
Bukas ang Iloilo Central Public Market mula 4:00 a.m.-10:00 p.m., habang ang Iloilo Terminal Public Market naman ay bukas mula 1:00 a.m.-10:00 p.m..
Ang redevelopment ng mga pamilihan ay bahagi ng kampanyang My Heart Beats in Iloilo City ng lokal na pamahalaan, na naglalayong ipakita ang natatanging pamana at kultura ng siyudad habang pinatitibay ang emosyonal na ugnayan ng mga residente sa kanilang lungsod.
