HATAW! D'yaryo ng Bayan hatawtabloid.com
PATAY ang magkakaibigang menor de edad na nagtatrabaho bilang sakada sa tubuhan nang sumalpok ang kanilang sinasakyang motorsiklo sa isang pampasaherong bus sa Hacienda Elenita, Barangay Burgos, Cadiz City, Negros Occidental, noong Biyernes ng gabi.
Kinilala ang mga biktimang namatay na sina Rolly, 17, Jay-r, 13, at Kim Jay, 17, pawang mga residente sa Barangay Burgos.
Sinabi ni P/ Lt. Daleen Grace Loreno, deputy chief ng Cadiz City Police Station, sakay ang mga biktima sa isang motorsiklo nang mag-overshot at sumalpok sa bus na nasa kabilang linya patungo sa Cadiz City.
Dahil sa lakas ng impact, tumilapon ang mga biktima na agaran nilang ikinasawi.
Nabatid na ang mga biktima ay magkakapitbahay at patungo sana sa tubuhan kung saan sila nagtatrabaho bilang mga sakada.
Isa sa mga biktima ang nakatakdang magtapos sa elementarya.
Nagpaabot ang Vallacar Transit Inc., ng burial assistance sa pamilya ng mga biktima, ayon kay Loreno.
Magpupulong ang magkabilang panig ngayong Lunes, 30 Marso, para sa kasunduan.
Nakalaya na sa kustodiya ng pulisya ang 36-anyos bus driver. (ALMAR DANGUILAN)
