Mahal na Araw sagradong panahon para magnilay — Rep Romualdez

GINUGUNITA ngayong linggo ng mga Kristiyano ang pinakamahalagang yugto sa buhay ni Hesukristo, ang kanyang paghihirap, kamatayan, at muling pagkabuhay. 

Kaugnay nito isang mensahe para sa Mahal na Araw ang ipinahatid ni Rep Martin Romualdez.

Aniya, “Ang Mahal na Araw ay isang sagradong panahon para sa panalangin at pagninilay. Ipinapaalala nito ang walang hanggang pag-ibig ng Diyos—isang pag-ibig na nagliligtas, nagbibigay ng pag-asa, at umaakay sa atin pabalik sa Kanya. Sa bawat sandali ng katahimikan, pinapaalala sa atin na hindi tayo nag-iisa.

“Sa gitna ng mga hinaharap nating pagsubok at suliranin, nawa’y magsilbing paanyaya ang mga araw na ito para sandaling huminto, magnilay, at balikan ang ating sarili. Panahon ito upang suriin ang ating mga puso at hanapin ang lakas na magpatuloy, ang tapang na magpatawad, at ang pusong patuloy na magmahal—lalo na sa mga panahong pinakamahirap itong gawin.

“Nawa’y ang panahong ito ay magsilbing instrumento ng paghilom para sa ating mga pamilya at sa ating buong bansa. Sa gitna ng mga hamon, samantalahin natin ang pagkakataong ito para muling magkaisa. 

“Sa ating pagdiriwang ng Muling Pagkabuhay, nawa’y muling mag-alab ang ating pananampalataya at malasakit sa isa’t isa, upang sabay-sabay nating abutin ang pangarap na isang lipunang may katarungan at malasakit sa kapwa.”