HATAW! D'yaryo ng Bayan hatawtabloid.com
NADAKIP sa isinagawang joint anti-drug operation ng Philippine Drug Enforcement Agency (PDEA-10) Camiguin Provincial Office at ilang law enforcement agencies ang isang incumbent vice mayor na nakompiskahan ng hinihinalang ilegal na droga o shabu na nagkakahalaga ng P102,000 sa pagpapatupad ng search warrant sa Guinsiliban, Camiguin Province nitong Martes ng gabi.
Sa ulat na natanggap ni PDEA Regional Director Alex Tablate, kinilala ang opisyal na isang alyas Tata, 66 anyos, residente sa Purok 3, Brgy. North Poblacion, Guinsiliban, Camiguin.
Dakong 11:00 ng gabi nang ipatupad ang search warrant ng mga opetratiba ng PDEA-10 Camiguin Provincial Office, sa koordinasyon ng PNP Camiguin Provincial Intelligence Unit, Provincial Drug Enforcement Unit, Mambajao Municipal Police Station (MPS), Guinsiliban MPS, at Provincial Mobile Force Platoon, na nagresulta sa pagkakadakip sa bise alkalde sa kaniyang tirahan sa nasabing barangay.
Nakompiska sa vice mayor ang limang plastic sachet ng shabu na tinatayang nagkakahalaga ng P102,000.
Nakuha rin sa operasyon ang isang .9mm pistol na may isang magazine, 22 rounds ng 9mm live ammunition, dalawang cellular phone, at iba’t ibang drug paraphernalia.
Mahaharap ang suspek sa mga kasong paglabag sa Sections 11 at 12, Article II ng Republic Act No. 9165, o mas kilala bilang Comprehensive Dangerous Drugs Act of 2002.
