Task Force Kasanag, Muling Nanawagan ng Mahigpit na Pananagutan sa mga Proyekto ng DPWH

Nagdaos ng press conference ang Task Force Kasanag (TFK) sa pamumuno ni Dr. John Chiong, DHum, upang ilahad ang pinakahuling update hinggil sa mga reklamong inihain nito kaugnay ng mga umano’y iregularidad sa ilang flood control at iba pang proyektong pang-imprastraktura ng Department of Public Works and Highways (DPWH).

Sa naturang pagharap sa media, inilatag ng organisasyon ang estado ng mga kasong sinimulan nito noong 2022 at muling nanawagan ng mahigpit na pananagutan sa paggamit ng pondo para sa pampublikong imprastraktura. Iginiit nito na ang bawat proyekto ay dapat sumailalim sa ganap na transparency, wastong oversight, at masusing pagsusuri.

Binigyang-diin ng Task Force Kasanag ang patuloy nitong pakikipag-ugnayan sa DPWH at sa mga kaukulang ahensya sa pamamagitan ng pormal na pagsusumite ng dokumento at ebidensya upang matiyak ang masusi, patas, at naaayon sa batas na pagsusuri sa mga reklamong may kaugnayan sa flood control at iba pang proyekto.

Mga Reklamong Inihain

Ipinaliwanag ni Dr. Chiong na pormal nang naghain ang kanilang grupo ng Ethics Complaint laban kay House Committee on Public Works Chairperson at Surigao del Sur 1st District Representative Romeo Salazar Momo Sr., kasama ang iba pang mga indibidwal at kompanya na saklaw ng kanilang mga reklamo.

Kabilang dito ang ilang kumpanyang ginawaran ng kontrata para sa multi-bilyong pisong flood control at iba pang proyektong pang-imprastraktura ng DPWH sa kani-kanilang rehiyon, gaya ng:

– GCI Construction and Development Corp. (Bicol)

– Equi-Parco Construction Company (Region XIII / X)

– Montesclaros Enterprises, Inc. (Region X)

– EUS Construction (Region V)

– Brentmin Roofing Enterprise (Region V)

– Centerways Construction and Development, Inc. (Region V)

– EGB Construction Corporation (Northern Luzon)

Nilinaw ng organisasyon na ang mga nabanggit ay batay sa dokumentadong kontrata at sa mga pormal na reklamong isinumite sa mga kinauukulang ahensya para sa pagsusuri. Ang lahat ng indibidwal at kompanya ay itinuturing na inosente hangga’t hindi napapatunayang nagkasala alinsunod sa due process ng batas.

Mga Naunang Hakbang

Muling binigyang-diin ng Task Force Kasanag ang mga reklamong inihain nito noong 2022 laban kina:

– Zaldy Co

– Eric Yap

– Edwin Gardiola

– Dating DPWH Secretary Manuel Bonoan

– Mga Regional Director ng DPWH

Tinukoy rin ng organisasyon ang mga kasong Plunder at Graft laban sa dating DPWH Undersecretary na si Romeo Momo, na kasalukuyang sumasailalim sa naaayon na legal na proseso.

Paninindigan at Patuloy na Hakbang

Ayon kay Dr. Chiong, kabilang ang Task Force Kasanag sa mga unang grupo na nagbigay-diin sa mga isyung may kinalaman sa flood control projects noong 2022. Aniya, magpapatuloy ang organisasyon sa pakikipagtulungan sa mga awtoridad at sa pagsusulong ng mga repormang magtitiyak ng integridad at mahigpit na pananagutan sa paggamit ng pondo ng publiko.

Muling pinagtibay ng Task Force Kasanag ang pangako nitong bantayan ang mga proyektong pang-imprastraktura at suportahan ang mga hakbang na magpapalakas sa transparency at accountability sa pamahalaan. (BONG SON)