HATAW! D'yaryo ng Bayan hatawtabloid.com
PUSH NA’YAN
ni Ambet Nabus
HABANG isinusulat namin ang column na ito ay nananalasa sa buong bansa ang super typhoon na si Uwan.
May mga nakita na kaming video mula sa iba’t ibang lugar na binabayo na nga nito gaya sa Virac, Catanduanes, Camarines Sur, Palawan, Aurora, Quezon at iba pa.
Nakatatakot ang mga nakita naming imahe ng malalakas na hangin at ulan, mga pagbaha at pagtumba ng mga puno, kaya’t ang pagdarasal talaga ang pinaka-kakampi nating lahat.
Sa sunod-sunod ngang pagdating sa atin ng mga kalamidad, hindi talaga maiiwasang magtanong tayo sa gobyerno kung talaga bang ginagawa nila ang lahat para sa mga mamamayan nila?
May mga kilalang celebrities nga tayong halos araw-araw na lang na nakatutok at nananawagan na papanagutin ang mga may sala at may kinalaman kung bakit nakakalbo ang mga bundok, may mga flood control issue, mga anomalya at korapsiyon at iba pang may public service item.
Kaya naman saludo tayo sa mga gaya nina Edu Manzano, Romnick Sarmenta, Carla Abellana, Vice Ganda, Alden Richards, Anne Curtis, Kim Chiu, Dennis Trillo, Gretchen Ho, Bianca Gonzales at iba pang hindi na natatakot usigin ang mga lider ng bansa.
