Hidwaan ng mga pamilya, batang magulang, nilutas ng CIA with BA 

“LET’S not lose sight of each other. Dapat visible po ang bawat miyembro ng pamilya sa bawat isa.” Ito ang pangwakas na mensahe ni Boy Abunda sa episode ng CIA with BA noong Linggo, Disyembre 8, matapos talakayin ang isyu ng dalawang pamilya na may kasamang mga teenager na magulang. 

Ipinakita ng episode ang mga hamon na kinakaharap ng mga batang pamilya, ang mga responsibilidad ng bawat miyembro ng pamilya, at ang kahalagahan ng bukas na komunikasyon para maayos ang mga ganitong isyu.

Sa segment na Case 2 Face, ipinahayag ni Rochelle ang mga alalahanin tungkol kay Renz, ang ama ng kanyang apo, kay Miel, ang kanyang batang anak. Ang pangunahing isyu ni Rochelle ay ang hindi pagtupad ni Renz sa kanyang obligasyon na magbigay ng pinansyal na suporta  sa kanilang anak.

Dahil si Renz ay isa ring tin-edyer, ang kanyang ina na si Rhea at ang kanyang tiyahin na si Farrah ang kumatawan sa kanya sa programa. Itinanggi nila ang mga paratang ni Rochelle at sinabing sila ay nagbibigay ng suporta mula nang nanganak si Miel, kabilang na ang mga pangangailangan ng bata.

Lalong lumala ang sitwasyon nang ipahayag ni Rochelle na hindi na niya papayagan ang pamilya ni Renz na makita ang kanyang apo at nagbanta siyang ipapa-ampon na lang ang bata. Ang mga magkasalungat na pananaw ng dalawang pamilya ay nagdulot ng karagdagang tensyon sa kanilang relasyon.

Bilang tugon, ipinaliwanag ni Senator Pia Cayetano, kasama ang kanyang mga abogado, na dahil ang parehong mga magulang ay menor de edad, ang buong pamilya ay may pananagutan sa kapakanan ng bata.

Ipinayo ni Sen. Pia na hindi muna dapat magsama sina Renz at Miel dahil hindi pa sila handa na maging ganap na magulang. Sa halip, dapat mag-focus si Rochelle sa pag-aalaga kay Miel, at sina Rhea at Farrah ay dapat magbigay ng suporta kay Renz upang maging handa sa pagiging ama.

Ipinaliwanag din ng senador na bagaman ang bata ay dapat manatili kay Miel bilang 

ina, kailangan pa rin ang tamang suporta mula sa pamilya ni Renz para sa kapakanan ng bata.

Iminungkahi rin ni Ate Pia na gumawa ng isang kasulatan na naglalaman ng mga responsibilidad at mga pangako ng bawat miyembro ng pamilya. Hinihikayat niya ang mga pamilya na iwasan ang paggamit ng masasakit na salita na magpapalala lamang sa kanilang hidwaan.

“It’s really a pressing concern worldwide and even in the Philippines, itong teenage pregnancies,” sabi niya. “Parang very timely ‘yung [appearance] niyong dalawang pamilya rito. Naipakita ‘yung real situation na mayroon talagang mga tin-edyer na nabubuntis, sa madaling salita.”

Dagdag pa niya, “And then it becomes an issue for the whole family, and we’re also hoping that it opens people’s eyes to the importance of having these honest conversations with young people to prevent teenage pregnancies from happening.”

Ang episode na ito ay nagbigay-diin sa kahalagahan ng suporta at responsibilidad ng pamilya, lalo na sa mga sitwasyong kinasasangkutan ng mga batang magulang. Sa pamamagitan ng pagbuo ng pag-unawa at komunikasyon, matutulungan ng pamilya ang mga kabataang magulang na malampasan ang mga hamon ng pagiging magulang at matiyak ang kapakanan ng bata.