HINDI nakapalag sa mga tauhan ng Criminal Investigation and Detection Team (CIDT) Bulacan ang notoryus na lider ng isang drug group na sangkot sa malawakang bentahan ng droga sa Cavite, NCR at Bulacan.
Sa ulat mula kay CIDG Provincial Office P/Major Jervies Soriano, kinilala ang suspek na si Ali Gasa Pangcoga, 41 anyos, alyas Pao Pogi, tubong Marawi City at lider ng Ali Gasa Drug Group, residente sa Brgy. Bambang 1 sa bayan ng Bulakan, Bulacan.
Base sa paunang imbestigasyon ni P/MSgt. Jayson Dela Cruz, nasukol sa inuupahan nitong bahay sa nabanggit na barangay si alyas Pao Pogi at nakompiskahan ng isang kalibre .45 baril at mga bala.
Nabatid na taong 2016 pa nagsimulang magbenta ng ilegal na droga si alyas Pao Pogi, inaresto sa bisa ng warrant of arrest na may cc.no.419-420-M-2024 sa kasong paglabag sa RA 10591 at RA 9165 na inilabas ng Branch 121 Meycauayan RTC.
Siya ang itinuturong pumatay sa dalawang asset ng pulis sa siyudad ng Meycauayan at siya rin ang inginuso na nagpapatay sa dalawa sa kanyang mga tauhan.
Napag-alamang si alyas Pao Pogi ay No. 7 most wanted sa lalawigan ng Bulacan at No. 1 most wanted sa siyudad ng Meycauayan. (MICKA BAUTISTA)