DonBelle kinagigiliwan ng mga lola, gustong ampunin

MA at PA
ni Rommel Placente

TALAGANG mas dumami pa ang mga adik na adik na panoorin ang hit romcom series ng tambalang Donny Pangilinan at Belle Mariano na Can’t Buy Me Love, base na rin sa nakukuha nitong rating at ranking sa iba’t ibang platforms ng Kapamilya.

Kahit nga ang mga lola na nakakausap namin ay talagang pinanonood ang nasabing serye dahil tuwang-tuwa at aliw na aliw sila sa DonBelle.

Gustong-gusto nga nilang ampunin sina Don at Belle at ituring nila itong parang mga tunay na apo dahil love na love na nila ang dalawa.

Talaga raw nawawala ang inip at pagka-aburido nila sa buhay kapag may mga bagong episode na ang serye. Feeling nila ay bumabata sila kapag nagpapakilig na ang DonBelle.

Samantala, bentang-benta rin ngayon ang isa sa kantang bahagi ng official soundtrack nito, ang Autumn ng Ben&Ben.

Nagsama ang nine-piece Filipino band at ang tinaguriang new gen phenomenal na si Belle para sa duet version ng awiting Autumn.

Inilalarawan nito ang pagsubok na dala ng distansiya na namamagitan sa dalawang taong puno ng pagmamahal. Isinulat ito nina Paolo Benjamin at Miguel Benjamin ng Ben&Ben at ipinrodyus nila ang song collaboration kasama sina ABS-CBN Music creative director Jonathan Manalo at Jean Paul Verona.

Unang inilabas ng banda ang orihinal na bersiyon ng awitin noong November.

Kamakailan ay inilunsad ni Belle ang album na Somber, kasama ang original tracks na Bugambilya, Somber and Solemn.

Umarangkada ito agad sa unang pwesto ng iTunes Philippines albums chart habang ang anim na awitin nito ay nakapasok sa top 30 ng singles chart. Bukod sa musika, kilala rin si Belle bilang mahusay na aktres na bumida sa seryeng He’s Into Her at romcom films na Love Is Color Blind at An Inconvenient Love.