Sa Tanay, Rizal
JEEP TINANGAY NG FLASHFLOOD 8 PASAHERO NALUNOD, PATAY

WALONG pasahero ang iniulat na nalunod at namatay

nang tangayin ng baha ang kanilang jeep na sinasakyan na nagtangkang tumawid sa ilog nitong Sabado ng gabi, 10 Disyembre, sa bayan ng Tanay, lalawigan ng Rizal.

Ayon sa spot report mula sa PRO4-A PNP, tinatawid ng isang jeep na minamaneho ng isang Pio Domeyeg, Jr., ang mababaw na bahagi ng ilog sa Brgy. Sta. Inez dakong 8:45 pm kamakalawa nang biglang tumaas ang tubig saka inanod ang sasakyan.

Dahil dito, hindi na nagawang makalabas ng walong pasahero ng jeep na naging dahilan ng kanilang pagkalunod at kalaunan ay kamatayan.

Samantala, nakaligtas si Domeyeg ngunit sinabing pinabayaan at iniwan ang kanyang mga pasahero.

Kinilala ng pulisya ang mga biktimang sina Terisita Quinto, Myller Kit Fernandez, Leonida Doroteo, Salvacion Delgado, Carmen Dela Cruz, Esmena Doroteo, Avelino at Deodora Buera.

Patuloy ang isinisagawang imbestigasyon ng mga awtoridad kaugnay sa insidente habang nagkasa na ng manhunt operation upang maaresto si Domeyeg.