Sanggol na babae iniwan sa kalye

NAKASILID sa isang kahon ang tinatayang 7-araw gulang sanggol na babae, natagpuang iniwan sa gilid ng kalye sa tapat ng isang puno, sa Makati City, nitong nakalipas na Biyernes, 27 Mayo 2022.

Inilipat sa pangangalaga ng Social Welfare Development Center ng Makati ang sanggol kasunod ng pag-turn-over sa barangay hall ng mag-asawang nakapulot.

Ayon sa desk officer ng Violence Against Women and Children Desk ng Barangay Bangkal na si Edna Felix, napansin ng mag-asawa ang kahon na nasa ilalim ng puno sa Capt. M. Reyes St., nang nadiskubreng beybi ang laman, agad dinala sa nakasasakop na barangay.

Maayos umano ang kondisyon ng sanggol na ipinasuri muna sa health center.

Nabatid na nag-ambagan ang mga residente ng barangay para maibili ng pangangailangan ang sanggol.

Naging katuwang ng VAWC ng barangay si P/SSgt. Jasmin Mae Danao ng Makati PNP na nagpadede ng kanyang gatas dahil nagkataong siya ay may 5-buwang sanggol na anak.

Nagsasagawa ng imbestigasyon ang pulisya para matukoy ang taong nag-abandona sa sanggol.

Nakunan ng closed circuit television (CCTV) ang hinihinalang ina ng bata, pero hindi namukhaan dahil sa suot na face mask at nakapayong na nanggaling umano sa EDSA, hindi sakop ng barangay. (GINA GARCIA)