Pagsirit ng presyo ng gasolina asahan diesel, kerosene magbabawas

MALAKING pagtaas ng presyo ng gasolina ang ipatutupad ngayong araw ng Martes habang malaki ang ibabawas sa presyo ng diesel at kerosene kada litro.

Ayon sa magkahiwalay na advisories, ng Chevron Philippines Inc. (Caltex), Pilipinas Shell Petroleum Corp., Seaoil Philippines Inc., at Total Philippines  ay magpapatupad ng P3.95 patong sa presyo kada litro ng gasolina habang babawasan ng P2.30 ang diesel at kerosene ng P2.45 sa bawat litro.

Magpapatupad ng parehong pagbabago sa gasolina at diesel ang Cleanfuel, Petro Gazz, at Unioil Petroleum Philippines Inc.

Unang magpapatupad ng bagong presyo ang Caltex pagsapit ng 12:01 am ngayong 24 Mayo, habang ang iba pang kompanyang nabanggit ay pagsapit ng 6:00 am, maliban sa Cleanfuel na bandang 8:01 am pa magpapatupad ng bagong presyo. (GINA GARCIA)