HATAW! D'yaryo ng Bayan hatawtabloid.com
NASAKOTE ng pulisya ang isang lalaking sinabing nagpatong ng isang hand grenade sa ibabaw ng kanilang mesa habang nag-iinuman kasama ang tatlong iba pa sa Brgy. Eden, bayan ng San Manuel, lalawigan ng Isabela, nitong Lunes ng gabi, 28 Marso.
Kinilala ng San Manuel MPS ang suspek na si Romel Velasco, 37 anyos, construction worker, na ayon sa mga nakasaksi ay tinuran sa Ilocano na: “awan sa met pulutan yu (wala naman kayo pulutan),” dakong 11:20 pm kamakalawa.
Dahil sa pagkabigla sa nakitang granada sa ibabaw ng mesa, nagpulasan ang mga kainuman ni Velasco para sa kanilang kaligtasan, saka iniulat sa mga opisyal ng barangay ang insidente.
Nagresponde ang mga tauhan ng San Manuel MPS kasama ang mga opisyal ng barangay sa lugar kung saan nag-iinuman ang apat.
“Naabutan pa ng mga pulis ang suspek sa lugar at inihagis ang granada patago, mabuti at hindi natanggal ang pin at ‘di sumabog,” pahayag ni P/Maj. Sunny Longboy, hepe ng San Manuel MPS.
Sa imbestigasyon, sinabi ng suspek na nakuha niya ang hand grenade sa Kalinga kung saan siya nagtatrabaho.
Tinukoy ng pulisya ang narekober na pampasabog na Mk 2 grenade .
Nakatakdang sampahan ng kasong paglabag sa PD 1866 kaugnay sa Omnibus Election Code si Velasco.
