HATAW! D'yaryo ng Bayan hatawtabloid.com
KINOMPIRMA ni Pilar, Abra Mayor Mark Somera na binawian ng buhay ang isang tagasuporta ni Vice Mayor Josefina Disono matapos maipit sa enkuwentro sa pagitan ng mga pulis at ng mga tauhan ng bise alkalde nitong Martes ng umaga, 29 Marso.
Ayon kay Somera, papasok umano sa munisipyo ang convoy ni Disono galing sa isang aktibidad nang paulanan ng bala ng mga pulis na nakahimpil sa inilatag nilang checkpoint sa Brgy. Poblacion.
Ngunit batay sa ulat ng Pilar MPS, imbes huminto ay kumaripas ang sasakyan ng bise alkalde sa checkpoint ng pulisya kaya pinaputukan.
Hinabol ng mga pulis ang sasakyan ni Dinoso na nakipagpalitan ng putok sa mga awtoridad hanggang dumating sila sa bahay ng bise alkalde.
Bagaman may kanya-kanyang bersiyon at akusasyon ang magkabilang panig, kasalukuyan nang nakakordon ang bahay ni Disono habang nagpapatuloy ang imbestigasyon.
