Huling nakita matapos magpabakuna
Caretaker sa Cebu natagpuang patay

WALA nang buhay nang matagpuan ang isang babaeng caretaker sa isang compound sa Brgy. Sabang, lungsod ng Danao, lalawigan ng Cebu, nitong Sabado ng umaga, 19 Pebrero.

Kinilala ng pulisya ang biktimang si Marivic Jabonelo, walang asawa, residente sa Bien Unido, lalawigan ng Bohol.

Ayon sa imbestigador ng kasong si P/Cpl. Mark Anthony Manulat, huling nakitang buhay ang biktima noong Miyerkoles, 16 Pebrero, na bumalik sa compound mula sa pagpapabakuna ng second dose ng CoVid-19 vaccine.

Pahayag ni Alex Gayas, head caretaker ng compound, natagpuan niya ang katawan ni Jabonelo nang puntahan niya sa kaniyang kubo dahil hindi umano kinuha ng biktima ang kaniyang sweldo.

Ani Gayas sa mga imbestigador, napansin niya ang masangsang na amoy pagpasok niya sa barong-barong.

Isasailalim ng Danao CPS sa awtopsiya ang katawan ni Jabonelo upang matukoy ang sanhi ng kaniyang kamatayan. (MICKA BAUTISTA)