Sa Samar
SK KAGAWAD DEDO SA BOGA

PATAY ang isang konsehal ng Sangguniang Kabataan (SK) sa lungsod ng Calbayog, lalawigan ng Samar, matapos barilin ng hindi kilalang suspek dakong 4:00 am, nitong Martes, 8 Pebrero.

Kinilala ang biktimang si Gerald Casaljay, 25 anyos, residente sa P-6 Brgy. Migara sa nabanggit na lungsod, tinamaan ng bala ng baril sa kaniyang kaliwang dibdib at kanang pisngi.

Samantala, nagawang makatakas mula sa kapahamakan ang kaniyang kasamang si Brandel Yrigon.

Base sa unang ulat mula sa Calbayog CPS, pauwi ang biktima matapos dumalo sa isang pista sa Brgy. Osmeña nang lapitan at barilin ng nag-iisang suspek na ayon sa mga nakasaksi ay nakasuot ng jacket na may hood.

Patuloy ang pagsisiyasat ng pulisya upang matukoy ang pagkakakilanlan ng suspek at ang kaniyang motibo sa likod ng pamamaslang.