HATAW! D'yaryo ng Bayan hatawtabloid.com
APAT katao ang sugatan kabilang ang tatlong prison guard ng Bureau of Corrections (BuCor) matapos tumakas ang tatlong preso sa New Bilibid Prison (NBP) sa Muntinlupa City kahapon ng madaling araw.
Sanhi ng mga tama ng bala sa katawan mula sa hindi pa batid na kalibre ng baril, ginagamot sa Ospital ng Muntinlupa ang mga biktimang sina CSO1 Angelito Marquez, 57 anyos, CO1 Mark Joseph Pesons, 29; CO1 Jancy Dagones, 26, at ang presong living out na si Michael Dullavin, ng Minimum Security Compound.
Naglunsad ng hot pursuit ang BuCor at pulisya laban sa mga tumakas na preso na kinilalang sina Pacifico Adlawan, convicted sa mga kasong Frustrated Homicide at paglabag sa Section 15, Article II, R.A. 9165; Arwin Bio, nahatulan sa kasong Murder at Attempted Murder, at Drakilou Falcon, may kasong Robbery with Homicide, pawang nakakulong sa Dorm A.
Ayon sa ulat na isinumite ng Muntinlupa City Police sa tanggapan ni P/BGen. Jimili Macaraeg, director ng Southern Police District (SPD), naganap ang insidente 1:00 am kahapon sa Maximum Security Compound ng NBP malapit sa Gate 4 ng naturang bilangguan.
Napag-alamang nilagare ng tatlong preso ang rehas na kanilang pinagkakakulungan dahilan upang makatakas at ngunit agad napag-alaman ng mga nakatalagang prison guard.
Nang tinutugis ng mga prison guard ang mga pumugang preso dito umalingawngaw ang sunod-sunod na putok ng baril.
Hanggang tamaan ang mga biktima, hinihinalang may baril din ang mga puganteng preso na nakipagpalitan ng putok sa mga awtoridad.
Patuloy ang imbestigasyon sa insidente. (GINA GARCIA)
