HATAW! D'yaryo ng Bayan hatawtabloid.com
PATAY ang isang opisyal ng Department of Education habang sugatan ang kaniyang asawa nang tambangan ng hindi kilalang mga suspek sa Purok Katilingban, Brgy. San Pablo, lungsod ng Tacurong, lalawigan ng Sultan Kudara, nitong Lunes ng gabi, 17 Enero 2022.
Kinilala ni P/Lt. Col. Joan Maganto, hepe ng Tacurong PNP, ang napaslang na biktimang si Javier Kumandi, Sr., 55 anyos, Pandag DepEd District Supervisor, habang sugatan ang kaniyang asawang si Jeannie Kumandi, 52 anyos, kapwa mga residente sa naturang lugar.
Sa paunang imbestigasyon, minamaneho ng biktima ang kanilang itim na Toyota Innova SUV, may plakang AGA 5857 habang pauwi, nang tambangan at paulanan ng bala ng mga suspek.
Agad dinala sa pagamutan ang mga biktima ngunit
binawian ng buhay ang opisyal ng DepEd, samantala, nakaligtas sa kapahamakan ang kaniyang misis.
Sa kasalukuyan, patuloy ang pagsisiyasat ng mga awtoridad upang matukoy ang motibo sa likod ng krimen at ang pagkakakilanlan ng mga suspek.
