Jennica no comment sa posibilidad na pagbabalikan nila ni Alwyn

Rated R
ni Rommel Gonzales

ANIM na buwan  ng hiwalay at patuloy na inaayos nina Jennica Garcia at Alwyn Uytingco ang kanilang pagsasama.

“Alwyn and I are working on our marriage. We are looking into the Lord for breakthrough,” panimula ni Jennica.

At sa tanong kung possible ang pagbababalikan, simple ang sagot ng aktres, “’Yun na lang muna po,” pakiusap nito.

“Kinakabahan po kasi ako kapag nakikita ko kami sa social media na napag-uusapan.

“As much as I’d like to say that I don’t really care about what other people say, I think in my entire life, ito ‘yung moment sa buhay ko na I’m not really in my best mental state.

“Kaya po I try to keep my answer short. Pasensiya na po kayo.”

Sa Las Hermanas ay nagbabalik-telebisyon si Jennica makalipas ang pitong taon, at amindao itong nahirapan siya.

“Ito kasi ‘yung pinakaunang kontrabida role po na naibigay sa akin. Hindi ko alam, I’m really hoping to get one before when I was actively doing work for GMA. But for some reason, kahit sabihin namin, parang hindi ganoong roles ang naibibigay.

“So ito, masayang-masaya ako na tanggapin siya, but I have to be honest, nahirapan po akong talaga.

“Nahirapan ako kasi bago siya sa akin. Dito ko nalaman na napakahirap palang maging isang kontrabida kompara sa role na parang api ka or ikaw ‘yung underdog.

“Kasi, mabigat ‘yung emotion na kailangang dalhin, and at the same time, ‘yung role ko po kasi is very different from my real personality.

“Siyempre, when we do a new character, we want to offer something new pero hindi maiiwasan na lumalabas pa rin ‘yung tunay na ikaw, right?”

Kabaliktaran ng tunay na Jennica Garcia ang karakter niya sa serye.

“Very loud po kasi siya na babae.

“Pero ang iniisip ko na lang po, kailangan ko talagang paghusayan para makita rin ng mga viewer natin kung ano ang aral if you have that kind of attitude toward others or if you have that personality.

“Kasi minsan, ‘di ba, kapag madali tayong magmata ng ibang tao, mas lalong hindi natin namamalayan na tayo sa sarili natin, ganoon din tayo.

“So, sana marami po silang aral na matutunan.”

Ipalalabas na sa October 25 sa GMA Telebabad ang Las Hermanas na pinagbibidahan nina Yasmien Kurdi, Faith Da Silva, at Thea Tolentino. Kasama rin dito sina Albert Martinez, Jason Abalos, Coleen Paz, Madeleine Nicolas, Melissa Mendez, Rubi Rubi, Robert Ortega, at Lucho Ayala.