Mag-anak niratrat sa loob ng kotse, 1 patay, 1 sugatan  

PATAY ang isang lalaki, habang sugatan ang kapatid na babae nang pagbabarilin ng mga suspek na riding in tandem habang nakasakay sa kotse, kasama ang kanilang mga magulang sa panulukan ng P. Ocampo at Bautista streets, sa Malate, Maynila kahapon ng umaga.

 

Idineklarang dead on arrival (DOA) sa Philippine General Hospital (PGH) ang biktimang si Edgar Ruamiro, 24 anyos, residente sa Tramo St., Pasay City.

 

Sugatan ang kapatid niyang si Luisa, 26 anyos, sales lady sa Mega Mall.

 

Sa ulat, naganap ang pamamaril habang sakay ng kotseng Chevrolet Spark LS, may plakang TOS 677 ang mga biktima kasama ang kanilang ama na si Ernesto, 47 anyos; at inang si Erlinda, barangay kagawad ng Barangay 53 Zone 7, Tramo, Pasay City.

Papunta umano ang mag-anak sa Paco Market para bumili ng peanut butter nang lapitan ng dalawang suspek na nakasakay sa motorsiklo at kaagad na pinagbabaril si Edgar na noon ay nakaupo sa tabi ng driver, habang tinamaan ng bala sa kanang braso si Luisa.

 

Patuloy ang isinasagawang imbestigasyon ng pulisya para matukoy kung ano ang motibo ng krimen at kung siya ba talaga ang target ng pamamaslang. (VV)