HATAW! D'yaryo ng Bayan hatawtabloid.com
BAGAY na magkakapatid sina Empress Schuck, Kristel Fulgar, at Andrea Brillantes dahil may hawig naman sila sa isa’t isa. Ito ang napansin namin nang mapanood ang Kahit Ayaw Mo Na nitong Martes sa SM Megamall Cinema 12 produced ng Viva Films, Blue Art Productions, at Spark Samar na idinirehe ni Bona Fajardo.
Simple lang ang kuwento na makailang beses na kaming nakapanood ng ganitong tema, depende na lang kung paano ito ie-execute ng direktor.
Si Empress ay designer at food vlogger naman si Kristel na parehong taga-Maynila at pumunta ng Samar para magbakasyon at maiba naman ang nakikita nila sa araw-araw.
Ang bahay na tinuluyan nila ay pag-aari nina Allan Paule at Desiree del Valle kasama ang anak nilang si Andrea Brillantes.
Parehong hindi nakagisnan nina Empress at Kristel ang kanilang mga ama dahil iniwan daw ang nanay nila noong ipinagbubuntis sila, pero nakuha naman nila ang pangalan, Zach Cruz na miyembro ng banda.
Hindi naman alam ni Desiree na ito ang ginamit na pangalan ng asawang si Allan noong binata pa kaya noong marinig ng huli kung anong pangalan ng mga ama nina Empress at Kristel ay nagulat siya dahil sa mahabang panahon ay nakita na niya ang mga dalaga niya.
Kaya nang ikasal na sina Allan at Desiree pagkalipas ng 20 years ay ipinagtapat niya ang kanyang nakaraan na nagkaroon siya ng ugnayan sa mga ina ng mga anak na sina Empress at Kristel na hindi niya alam na nagbunga ang pagiging mapusok niya.
Nagulat ang lahat, lalo na ang magkakapatid pero sa kabilang banda ay nagkasundo-sundo rin.
Ipinakita rin ni direk Bona ang magagandang lugar sa Samar na roon sila nag-shoot lalo na ang Ulot River na may eksenang Kayaking si Kristel.
Tulad din ni direk Chito Roño ay ipinakita rin nito ang maganda at tahimik na lugar sa Samar na nag-shoot sila ng Signal Rock.
Going back to Kahit Ayaw Mo Na ay nabibingi kami sa mga supporter nina Empress, Kristel, at Andrea na walang humpay sa kasisigaw pagkatapos ng palabas at talagang kompleto pa sila sa banner na iwinawagayway nila loob ng sinehan hanggang paglabas.
Palabas na kahapon, December 5 ang Kahit Ayaw Mo Na mula sa Viva Films.
FACT SHEET
ni Reggee Bonoan
