HATAW! D'yaryo ng Bayan hatawtabloid.com
AKMA sa pagiging simple ni Kyline Alcanta ang tagline ng bagong produktong ineendoso niya, ang Symply G Hair and Skin Care na pag-aari ni Mr. Glen Sy, ang Ipasa ang Simply G, Simpleng Ganda.
Sa launching ng Symply G sa kanilang newest ambassadress na si Kyline na isinagawa sa Luxent Hotel at pinamahalaan ng kanilang PR na si Wheyee Lozada, nakatatawag-pansin din ang jingle ng produkto na likha ni Lito Camo.
Simpleng ganda, malakas ang dating. Ganyan ituring si Kyline ng kanyang mga Sunflower (tawag sa kanyang fans/followers). At ito rin naman ang gusto ng batang aktres dahil ‘ika nga niya, hindi siya maarte.
Ani Kyline, hindi siya maarte pero pinaghahandaan niyang mabuti ang bawat paglabas niya.
“Mas gusto ko po talaga ang simpleng ganda,” giit niya na siya ring tagline ng kanilang produktong Symply G na gumagawa ng moisturizing Soap, whitening soap, keratin shampoo at conditioner with camella oil at aloe vera and non greasy with Sunblock, at SPF 20 moisturizing and whitening lotion.
Sa totoo lang, hindi na mabilang ni Kyline ang mga produktong ineendoso niya. Kaya naman sobra-sobra ang katuwaan niya na nadaragdagan ang mga produktong nagtitiwala sa kanya.
“I feel so honored dahil pinagkakatiwalaan na nila ako para maging ambassadress ng kanilang product,” anito sa paglulunsad sa kanya bilang ambassadress ng Symply G. “And ipina-promise ko rin sa kanila (mgnt.) na gagawin ko ang lahat para mai-spread ang news na mayroong product na ganito, Symply G.”
Paglilinaw ni Kyline, ginagamit muna niya ang isang produkto bago niya iendoso.”Hindi po ito ‘yung nag-offer lang sila para i-endorse ko ‘yung product nila. Tinest ko po muna talaga. Kaya alam ko sa sarili ko na I’m confident na i-endorse at maging ambassadress nito.
“Siyempre po ayokong manloko ng mga Sunflower na sumusuporta sa akin at sa sumusuporta ng produktong ito.”
Samantala, uumpisahan na ni Kyline ang kanyang series sa GMA 7 na makakasama niya si Therese Malvar.
“Opo parang magiging labanan ito ng aktingan. Ang press release nga namin eh kami ang Nora Aunor at Vilma Santos. Si Nora si Therese.”
At dahil isa ng internationally awarded Filipina actress si Therese, natanong si Kyline kung hindi ba siya nai-intimidate rito gayung nanlalamon ito sa eksena?
“Hindi naman po. Kasi ako naman po I don’t compete with anyone. I just compete with myself.
“Like with my past work ‘yun din ang parang gusto kong makipagkompetensiya pero hindi sa kapwa artista ko. Ginagawa ko lang ang gusto ko, ang magtrabahong mabuti.
“Gagalingan ko na lang,” paniguro pa ni Kyline.
SHOWBIZ KONEK
ni Maricris Valdez Nicasio
