Mon at Ben, Cain at Abel ng makabagong panahon

NAKALULUNGKOT na ang nag-aaway ngayon ay ang magkapatid at kapwa mamamahayag na sina Mon at Ben Tulfo kaugnay ng P60-M advertising contract ng PTV 4 at ng media company ng huli, ang Bitag, damay ang Department of Tourism.
Parang sina Mon at Ben sina Cain at Abel sa makabagong panahon (harinawa’y walang pagdanak ng dugo ang mangyari).
Sa pagbibitiw kasi ni dating DOT Secretary Wanda Teo (kapatid nina Mon at Ben) out of delicadeza, to the rescue ang kanilang Kuya Mon para ipagtanggol ito. Ngunit ibinaling naman ni Mon ang sisi kay Ben.
Dahil dito’y nagkaroon ng berbal na komprontasyon ang dalawang Tulfo brothers.
Samantala, itinanggi naman ng iba pang kapatid nila—sina Raffy at Erwin—na bahagi o “naambunan” sila mula sa million-peso ad deal,
Of the four brothers ay naabutan namin noong konektado pa kami sa Radyo Singko sina Ben, Raffy, at Erwin. Noon pa ma’y naririnig na namin na sila-sila rin pala’y hindi magkakasundo (are we correct na hindi nagkikibuan sina Ben at Raffy?).
Sa kung anong dahilan sa likod ng sibling rivalry na namamagitan sa kanila’y hindi namin alam. This much we know, lahat ng mga barakong Tulfo ay pinagbuklod ng iisang katangian o family value: ang pagtangi’t pagmamahal sa kanilang ina.
Sa nangyayaring sigalot sa magkakapatid, tiyak na ikinalulungkot ‘yon ng kanilang matriarch. Pero sana’y may isang taong pumagitna upang pagkasunduin sila.
Samantala, humanga kami sa pagbibitiw ni Wanda Teo sa nasabing kagawaran. Kapag delicadeza na ang umiral sa tao’y malaki ang palatandaan na pinahahalagahan niya ang kanyang pagkatao.
Sa mga nagtatanong naman kung si Ben ba ‘yung madalas bumanat ng Ingles na may twang pa? Yes, si Ben ‘yon at wala nang iba pa. Ewan kung malaki ang impluwensiya sa kanya ng landmark na Big Ben sa England.