Lloydie nakiusap, tigilan na ang pagli-link sa kanila ni Maja

NAGSALITA na si John Lloyd Cruz tungkol sa pagkaka-link niya kay Maja Salvador.  Ayon sa una, nababaduyan siya sa isyu sa kanila ng huli.

“Eh, paano na hindi ka mababaduyan, ayoko nang mag-expound kasi alam ko naman ang trabaho ninyo (reporters),” sabi ni John Lloyd sa interview sa kanya ng Pep.ph.

Iginiit ng award-winning actor na magkaibigan lang sila ni Maja.

“The more na hindi dapat lagyan ng ganoong anggulo. Nagagamit lang sa airtime sa iba’t ibang show, and we don’t appreciate kasi napakaliit ng bakuran natin.

“Alam ninyo, rito, lahat tayo magkakasama, magkakakilala tayo lahat dito. Alam ninyo kung ano ang totoo at hindi. Hindi ako napipikon, naiintindihan ko ang media.”

Pero pakiusap lang ni Lloydie sa media, sana raw, imbes na magbigay ng liwanag ay huwag nang dumagdag sa pagbibigay ng kalituhan sa mga tao.

Iwas naman ang binata nang tanungin kung handa na ba siyang pumasok sa panibagong pakikipagrelasyon. Ang huling naging girlfriend ni John Lloyd ay si Angelica Panganiban.

Aniya, “It’s something na hindi mo naman… alam mo ba kung kailan ka magiging ready for a relationship? I don’t think so.”

MA at PA – Rommel Placente