HATAW! D'yaryo ng Bayan hatawtabloid.com
BUTUAN CITY – Patuloy pang ginagamot sa ospital ang ilan sa walong pasaherong sakay ng isang UV Express van na sumemplang sa gilid ng national highway ng Brgy. Alubihid, Buenavista, Agusan del Norte dakong 3:00 am kahapon.
Napag-alaman, mula sa Cagayan de Oro City ang van at patungo sa Surigao City ngunit hindi na umabot pa sa destinasyon dahil sa insidente.
Ayon sa isa sa mga pasahero, mula pa lang sa Brgy. Puerto sa Cagayan de Oro City, sobrang bilis na ang pagpapatakbo ng driver kaya’t muntikan silang madisgrasya sa nakasalubong nilang sasakyan sa bayan ng Villanueva, Misamis Oriental.
Habang ayon sa konduktor nitong si Joseph Requiza, 39, taga-Tagum City, 10 silang lahat na sakay ng van kasama na ang isang batang nakaligtas sa insidente.
Dagdag pa ni Requiza, nakatulog siya kaya’t nabigla na lamang siya nang sumemplang ang sasakyan.
