Drug pusher sa Munti patay sa buy-bust

ISA pang hinihinalaang tulak ng droga na armado ng baril ang napatay makaraan lumaban sa isang pulis sa isinagawang buy-bust operation sa Muntinlupa City kamakalawa ng gabi.

Namatay noon din sanhi ng tama ng bala sa katawan ang suspek na si Jun Vivo, alyas Bangus/Kareem, walang hanapbuhay, at residente sa Balbanero’s Compound, Alabang, Muntinlupa.    Ayon sa pulisya, dakong 11:30 pm nang maganap ang pangyayari sa Balbanero’s Compound, Alabang, nang magsagawa ng operasyon sa naturang lugar ang mga operatiba ng Station Anti-Illegal Drugs-Special Operation Task Group (SAID-SOTG) ng Muntinlupa City police upang madakip si Vivo, isang hinihinalang drug pusher.

Nagpanggap si PO1 Patrick Lambiquit bilang poseur buyer at naka-score kay Vivo ng shabu kapalit ng P300 marked money.

Sa puntong ito, nagpakilala bilang pulis si PO1 Lambiquit per nang aarestohin si Vivo ay nagbunot ng baril at siya ay pinaputukan ngunit hindi tinamaan.

Ayon sa pulisya si Vivo, kilalang drug pusher, ay nasa grupo ni Abraham Maruhom, alyas Tatay Muslim, isang big time drug pusher na napatay noong Marso 3, 2016, sa enkwentro at malubhang ikinasugat ni S/Insp. Peter Aquino, ng Muntinlupa City Police, sa 7C, Sitio Ilaya, Alabang.

( MANNY ALCALA )