HATAW! D'yaryo ng Bayan hatawtabloid.com
NAG-GUEST kamakailan sa ASAP Chill Out si Miho Nishida, ang itinanghal na Big Winner sa Pinoy Big Brother 737, na nagsayaw siya ng Trumpets challenge. Naging back-up dancers niya ang all male group na Good Vibes.
Noong i-post sa You Tube ang guesting na ‘yun ni Miho ay nakakuha ito ng mahigit isang milyong views na labis na ikinatuwa ng dalaga.
“Bongga ‘yun ‘di ba na naka-mahigit one million views kami? At iba pa rin siyempre ‘yung may kasama kang back up dancers habang gumigiling-giling ka para mas lalong bongga,” sabi ni Miho nang makausap namin siya.
Hilig talaga ni Miho ang sumayaw kaya naman natuwa siya nang napabilang siya sa all-female group na Girl Trends na regular mainstays sa It’s Showtime.
“Nahahasa rin ako sa Girl Trends. ‘Di ba bongga rin ‘yun? At nagiging sexy na ako dahil sa laging pagsasayaw,” natatawang sabi pa ni Miho.
Kung ‘yung ibang grupo ay hindi nagkakasundo, na nagkakaroon ng inggitan sa bawat member, masasabi ni Miho na sa grupo nila ay walang ganoon, maganda ang kanilang samahan.
Sabi pa ni Mijo tungkol sa kanilang grupo,”Nagtutulungan kami sa lahat ng bagay. Naghihiraman kami ng damit, ganoon. Parang magkakapatid na kaming lahat.”
Si Tommy Guevarra ang boyfriend ni Miho na gaya niya ay produkto rin ng PBB 737. Kamusta na ang relasyon nila ni Tommy?
“Sweet pa rin naman kami. Super happy, enjoy-enjoy lang, ganoon pa rin, kulitan,” sagot ni Miho.
Sa ngayon daw ay almost five months nang tumatakbo ang relasyon nila ni Tommy. At maipagmamalaki raw niya itong boyfriend dahil, ”Hindi siya nagbago eversince. Tinatanong ng iba, si Tom sweet lang ba siya sa harap ng kamera? Sabi ko, hindi totoo ‘yan. Kahit wala kami sa harap ng kamera, sweet pa rin siya sa akin.”
Ano ang isang bagay na magagawa ni Tommy sa kanya para makipaghiwalay siya rito?
“Siguro kapag nalaman kong nag-cheat siya, ayoko na. Siyempre gusto ko, ako lang.”
Selosa ba siyang girlfriend?
“Oo naman. Pero siyempre nasa lugar naman. Siya rin naman seloso.”
MA at PA – Rommel Placente
