MANILA — Isang malaking hakbang para sa Philippine golf at sports tourism ang paglulunsad ng Golaman, ang kauna-unahang online booking platform na sumasaklaw sa 79 golf course sa iba’t ibang bahagi ng bansa.
Kabilang sa mga covered destination ang Manila, Tagaytay, Clark, Subic, Batangas, Cebu at Davao.
Matapos ang halos isang taong development ng Korean-led company na Philippine Golf Resort Reservations (PGRR), maaari nang i-download ang Golaman sa Android Play Store. Inaasahang magiging fully operational ang app sa Setyembre 15, ayon kay PGRR CEO Aaron Kim.
Sa media launch nitong Biyernes sa Philippine Sports Commission House, sinabi ni Kim na layunin ng platform na itaas ang Pilipinas bilang pangunahing golf destination sa Asya, kaagapay ng Vietnam, Thailand, Japan, South Korea at Singapore.
Dumalo sa paglulunsad sina PSC chairman Patrick Gregorio, National Golf Association of the Philippines president Al Panlilio at secretary-general Bones Floro, Department of Agriculture Undersecretary Arrey Perez at Tourism Promotions Board COO Marga Nograles.
“I think this program will click. We’ve been talking about this for the last 12 months and now it’s here. It’s a perfect collaboration,” ani Gregorio.
Umaasa si Gregorio na mas maraming golf course sa mahigit 120 sa buong bansa ang sasali sa programa.
“If we push sports tourism we push sports development,” diin ng PSC chief, na chairman din ng Philippine Sports Tourism-Inter Agency Committee.
Ayon naman kay Panlilio, higit pa sa booking app ang Golaman dahil magsisilbi itong pundasyon ng national golf tourism initiative.
“Golaman is not simply a booking platform but a launch of the national golf tourism initiative,” ani Panlilio.
Layunin aniya nitong gawing mas tanyag ang Pilipinas bilang golf destination, lumikha ng trabaho at negosyo, at makahikayat ng mas maraming turista.
Naniniwala rin si Panlilio na makatutulong ang proyekto sa pag-unlad ng Philippine golf at pagtuklas ng mga bagong talento.
“We have a lot of Alex Ealas in golf,” aniya, patungkol sa tennis superstar na si Alex Eala.
Samantala, sinabi ni Nograles na higit pa sa isport ang golf dahil nagsisilbi itong daan upang matuklasan ng mga turista ang kultura at world-class golf courses ng bansa.
“This is a milestone initiative,” ani Nograles. (PSC/HNT)
