HATAW News Team
ARESTADO ang isang 51-anyos babae na sinabing dumukot sa isang 7-buwang gulang na sanggol na lalaki sa lungsod ng Cabuyao, lalawigan ng Laguna, nitong Martes, 21 Hulyo.
Ligtas na natunton at nasagip ng mga awtoridad ang sanggol sa Rodriguez, Rizal, wala pang 24 oras mula nang siya ay tangayin ng suspek.
Ayon sa pulisya, nagsimula ang insidente nitong Lunes ng umaga, 20 Hulyo, nang imbitahan ng suspek ang kaniyang dating kapitbahay kasama ang kaniyang anak na magtanghalian sa isang fast-food restaurant sa loob ng isang mall.
Habang kumakain, inalok umano ng suspek ang ina ng biktiam na kargahin ang sanggol upang matapos niya ang kaniyang pagkain.
Anang ina ng biktima, dahil nakatulog ang kaniyang anak habang karga ng suspek, hindi niya naisipang kunin ang sanggol upang huwag maistorbo ang pagtulog.
Matapos mananghalian, muling nag-alok ang suspek na bilhan ng diaper ang sanggol.
Sinabi niya sa ina na pagod na siyang maglakad at siya na lamang ang pumuntang supermarket habang hinihintay nila ng kargang sanggol.
Pagbalik ng ina ng biktima, wala na ang suspek at ang kaniyang anak.
Dahil dito, agad humingi ng tulong ang tulirong ina sa mga guwardiya ng mall ngunit bigo silang makita ang suspek at kaniyang anak.
Sa pagsuri ng kuha ng CCTV ng mall, nakita ang suspek na lumabas ng mall karga ang sanggol, saka tumawid ng kalsada at sumakay ng jeep.
Hinanap sa social media ni Pat. Ray Christian Naval, imbestigador ng Cabuyao CPS, ang mga kaanak ng suspek at nakausap ang isa sa kaniyang mga anak na nagkompirma na nasa bahay nila ang sanggol sa Brgy. San Isidro, Rodriguez, Rizal.
Nitong Martes, nagtungo ang mga pulis at mga social worker naturang bayan kung saan nila ligtas na nasagip ang sanggol at ibinalik sa kaniyang ina.
Ayon sa mga imbestigador, pinaniniwalaang gustong itago ng suspek ang sanggol at dalhin sa Bataan upang palakihin bilang sariling anak.
Sa isang panayam, inamin ng suspek na plinano niya ang pagdukot sa sanggol at ipakikilalang anak nila ng kaniyang kinakasamang nagtatrabaho sa Tarlac.
Sinabi ng suspek na nakunan siya ngayong taon at hindi alam ng kaniyang kinakasama.
Humingi ng tawad ang suspek sa mga magulang ng biktima at nagmakaawang iurong ang reklamo laban sa kaniya ngunit determinado ang ina ng biktima na ituloy ang kaso.
Kasalukuyang nasa kustodiya ng Cabuyao CPS Detention Facility ang suspek at nahaharap sa mga kasong Other Forms of Kidnapping at Failure to Return a Minor.
