INARARO ng saksak hanggang mapatay ng isang 29-anyos lalaking sinabing may problema sa pag-iisip ang 51-anyos ina sa bayan ng San Francisco sa Camotes Island, Cebu nitong Martes ng umaga.
Kinilala ang biktima bilang alyas Melody, tinamaan ng mga saksak sa iba’t ibang bahagi ng katawan nagresulta ng kamatayan.
Sa ulat ng Cebu Provincial Police Office (PPO), nangyari ang insidente sa tahanan ng pamilya sa nasabing lugar.
Sa imbestigasyon, nagtungo sa Health Center ang ina para umano humingi ng panturok na gamot para pakalmahin ang anak upang hindi sumpungin ng sakit sa pag-iisip.
Ngunit nang malaman ng anak, galit na galit na kinompronta ang ina dahil ayaw niya ng “injectable medicine”
Agad kumuha ng patalim sa kusina ang suspek saka hinabol ng saksak ang ina kaya tumakbo upang makaiwas.
Pero nakorner ang ginang sa bakanteng lote kung saan pinagsasaksak nang ilang beses hanggang ikinasawi ng biktima.
Mabilis na tumakas ang suspek, pero nahuli ng pulisya sa follow-up operation. Sasampahan ng kasong parricide ang anak.
