InnerVoices Back2Back with Chito Miranda sa Hard Rock dinagsa
SHOWBIZ KONEK
ni Maricris Valdez
PANALO ang muling pag-akyat sa stage ng Innervoices noong Huwebes sa Hard Rock Cafe Manila dahil ka-back2back nila si Chito Miranda at ang mga kagrupo nito sa Parokya Ni Edgar.
Punompuno ang Hard Rock Cafe noong gabing iyon na bagamat may kamahalan ang ticket o entrance fee ay dinagsa talaga ng mga gustong makarinig ng musika ng Innervoices at ni Chito.
Matagal-tagal ding nawala ang Innervoices na kinabibilangan nina Atty. Rey Bergado (founding member at keyboard); Patrick Marcelino (lead vocals); Joseph Cruz (keyboard); Rene Tecson(lead guitar); Alvin Herbon ( bass); at Jojo Esparrago (drums) para harapin ang kanya-kanyang personal na buhay.
Ayon kay Atty Rey, hindi nila mahindian ang imbitasyon ng Hard Rock kaya muli silang napapayag sumampa ng entablado at mag-perform.
“Kapag nai-invite kami at gusto namin, pumupunta kami para tumugtog,” ani Atty Rey.
“Itong sa Hard Rock ininvite kami, eh kapamga namin kaya umoo kami.
“Paminsan-minsan kung may mga nag-iinvite at okey sa amin, go kami,” sambit pa ng lider ng grupo.
Kuwento naman ni Patrick, “nag-sched agad si Atty a few days ago ng rehearsal, kasi after a few months na hindi kami magkasama hindi talaga biro iyon.
“We might forget the chords, the lyrics. So, I have 2-3 days preparations para sa rebyuhin uli ang mga original songs and siyempre ‘yung mga trending 80’s music na madalas namin kantahin at tugtugin.”
Aminado si Patrick nq na-miss niya ang crowd at ang grupo.
“Opo, I’m so happy na magkakasama na naman kasi. Nakaka-miss talaga,” nakangiting sambit pa ni Patrick.
Biglang singit naman ni Atty. Rey, “ipinakikilala namin sa inyo ang Marcels.
“Really abangan ninyo ang Marcels maglalabas na sila ng kanta, supported namin yan,” sundot pang wika ni Atty. Rey.
Ang Marcels ang bagong indie band na inilunsad ni Patrick (frontman). Bale ang Marcels ang side project niya habang may commitment pa rin siya sa InnerVoices.
Iginiit naman ni Atty. Rey na hindi nawala ang grupo nilang Innervoices. “Hindi naman kami nawala. It’s just that hindi na namin kaya ‘yung palaging tugtugan, from time to time kalag nami-miss namin ang isa’t isa eh ‘di magkita-kita kami.
Sinabi pa ni Atty Rey na nagkikita-kita pa rin silang magkaka-grupo kahit wala silang gig.
Tiniyak pa ni Atty Rey na masusundan pa ang gig nila.
“Of course there will be another one, ang tanong lang kung kailan ‘yun ang hindi ko masagot.”
O ayan tiniyak ni Atty Rey na muling mapakikinggan ang Innervoices kaya abang-abang na lang tayo kung kailan muli natin sila matutunghayan.
For the meantime, pakinggan na muna natin ang kanilang mga musika sa Spotify tulad ng Meant To Be, Saksi Ang Mga Tala, Sayaw Sa Ilalim Ng Buwan, at I Will Wait For You In The Rain.
