Hiker sa Mt. Apo nahulog sa tinuntungang bato

HIMALANG nakaligtas ngunit sugatan ang isang 37-anyos hiker nang mahulog mula sa tinutuntungang bato nang hampasin ng malakas na hangin habang inaakyat ang Mt. Apo nitong Sabado, 30 Mayo.

Sa ulat, naganap ang insidente dakong 9:00 ng umaga sa Sta. Cruz trail ng Mt. Apo habang binabagtas ng grupo ng hiker na kinilalang si Glaiza Principe, residente sa Quezon City, ang nasabing trail, ay biglang humangin nang malakas, dahilan upang mawalan siya ng balanse at mahulog sa white sand area na tinatayang may lalim na 30 metro.

Agad siyang sinaklolohan ng kaniyang mga kasamang climber at humingi ng tulong sa rescue team.

Mabilis na nagresponde ang rescue team at agad na dinala sa pagamutan ang biktima.

Kasalukuyang nasa ligtas nang kalagayan si Principe at nagpapagaling sa Digos Doctors Hospital.