Bebot na nursing student kalaboso sa sextortion
Nangikil ng P.6-M ‘enrollment fee’

NASAKOTE ang isang babaeng nursing student sa entrapment operation ng Pasig City Police nang ireklamo ng isang empleyado ng banko sa Pasig City.

Sa ulat ng Pasig City Police Station dakong 2:30 ng madaling araw nitong Sabado, 23 Mayo 2026 nang madakip ang suspek sa isang coffee shop sa nabanggit na lungsod.

Batay sa reklamo ng biktima, mula pa noong Marso ng taong kasalukuyang ay hindi siya tinatantanan ng pananakot ng suspek na ibubulgar ang kanilang mga pagtatalik kung hindi siya magbibigay ng pera.

Sa kabila ng mahigit dalawang buwan ay umabot sa P600,000 ang mga ‘nakikil’ nito sa kanya hanggang muling nangulit at nanghihingi ng P6,000 para ipambayad ngayong enrollment.

Kaya nagpasya ang biktima na humingi ng tulong sa pulisya.

Agad ikinasa ng mga awtoridad ang operasyon na nagresulta sa pagkakadakip ng suspek.

Nakapiit na ang suspek na sinampahan ng reklamong Robbery (Extortion).  (HATAW News Team)