HATAW! D'yaryo ng Bayan hatawtabloid.com
NAGSAGAWA ang CIDG Angeles City Field Unit, kasama ang Philippine Air Force (PAF), Armed Forces of the Philippines (AFP) intelligence unit ng isang operasyon para sa pagpapatupad ng batas dahil sa paglabag sa Republic Act 9711 (Food and Drug Administration Act of 2009) sa isang Beauty Clinic sa Mc Arthur Highway, Balibago, Angeles City, Pampanga.
Ang operasyon ay nagresulta sa pag-aresto sa tatlong babaeng suspek, kabilang ang isang Vietnamese, at ang pagkumpiska ng iba’t ibang hindi rehistradong mga produktong kosmetiko at pampaganda – injectable skincare, whitening cream, hair care treatment, bitamina at suplemento, chemical peeling agents, herbal products at iba pang mga medikal na suplay na tinatayang nagkakahalaga ng PhP 247,250.00.
Sa ulat na nakarating kay PMGeneral Robert AA Morico II, ang direktor ng CIDG, ang mga naarestong suspek ay kinilalang sina “Phan”, babae, Vietnamese, manager ng Beauty Clinic kasama ang mga empleyadong sina “Aida” at “Kim.
Naaktuhan ang mga suspek habang hawak at kinokontrol, nag-iimbak at nagbebenta ng mga produktong kosmetiko at pampaganda na hindi rehistrado sa Food and Drug Administration (FDA) at nag-ooperate nang walang kinakailangang License to Operate (LTO), na nagiging dahilan upang maging ilegal ang kanilang operasyon.
Binigyang-diin ng direktor ng CIDG na ayon sa Republic Act No. 9711, na kilala rin bilang “Food and Drug Administration Act of 2009”, pinoprotektahan at itinataguyod ng Estado ang karapatan sa kalusugan ng mga mamamayang Pilipino; at pinahuhusay ang kapasidad nito sa regulasyon, pinapalakas ang kakayahan nito patungkol sa inspeksyon, paglilisensya at pagsubaybay sa mga establisyimento, at ang pagpaparehistro at pagsubaybay sa mga produktong pangkalusugan.
Sa gayon, ipinagbabawal ang paggawa, pag-angkat, pagbebenta, pag-aalok, pamamahagi, paglilipat ng mga produktong pangkalusugan at pagkain nang walang kinakailangang awtorisasyon mula sa kinauukulang ahensya.
Pinuri ng pamunuan ng CIDG si PColonel Grant A Gollod, ang regional chief ng CIDG Regional Field Unit 3, at ang CIDG Angeles Provincial Field Unit na pinamumunuan ni PMajor John Lloyd G Bawag para sa pag-aresto sa mga lumalabag sa batas; at ang pagkumpiska ng mga sinasabing ipinagbabawal na produktong pampaganda. (MICKA BAUTISTA)
