Lacson nanindigan sa rekomendadsyon ng Blue Ribbon

“GINAWA ko lang ang trabaho ko.”

Tahasang sinabi ito ni Senate President Pro-Tempore Panfilo “Ping” Lacson kaugnay ng pagkakasangkot ng tatlong senador sa kaniyang inilabas na Senate blue ribbon committee partial report na kanyang pinamumunuan.

Aminado si Lacson na wala siyang magagawa kung sumama o magalit sa kanya ang kanyang mga kapwa senador dahil ibinatay niya ang kaniyang partial report mula sa mga pahayag ng resource persons at mga ebidensiyang lumabas sa pagdinig ng senado.

Ani Lacson, wala siyang dapat ikonsidera o ikabagabag sa kanyang inilabas na partial report dahil ang laman nito ay pawang katotohanan at batay sa naging resulta ng isinagawang imbestigasyon ng komite.

Para kay Lacson, hindi rin mahalaga kung papansinin siya o hindi ng mga kasamahan niyang senador na kasama sa kanyang mga rekomendasyon dahil inilabas niya ang katotohanan na resulta ng imbestigasyon.

Tiniyak ni Lacson na magkakaroon pa ng imbestigasyon ngunit bigong matukoy kung kailan at ilan pang pagdinig ang magaganap.

Binigyang-linaw ni Lacson na naglabas siya ng partial report nang sa ganoon ay hindi mahaba ang magiging final report ng komite lalo na’t ngayon pa lamang ay mahigit 400 pahina na ang partial report.

Kaugnay nito, hindi umano nababahala sina Senador Joel Villanueva at Senador Jinggoy Estrada sa rekomendasyong sampahan sila ng kasong Plunder at magsagawa ng malalimang imbestigasyon.

Inihayag ng dalawa na wala silang kinalaman sa mga tinatawag na ghost projects at anomalya na iniuugnay sa kanila.

Umaasa sina Estrada at Villanuea na mananaig at lalabas ang katotohanan ukol sa isyu.

Naniniwala si Lacson na ang kung lumagda sina Estrada, Villanueva at Senador Francis “Chiz” Escudero sa partial report ay isang pagkakataon upang malinis nila ang kanilang pangalan.

Aniya, maaaring hilingin sa floor sa pamamagitan ng interpellation na hilingin na tanggalin sa nilalaman ng partial report ang rekomendasyon sa kanilang tatlo. (NIÑO ACLAN)