HATAW! D'yaryo ng Bayan hatawtabloid.com
NAALARMA ang buong campus ng Polytechnic University of the Philippines (PUP), sa Sta. Mesa, lungsod ng Maynila, matapos tupukin ng apoy ang Main Academic Building nitong Martes ng hapon, 5 Mayo.
Natukoy ng Bureau of Fire Protection (BFP) na nagmula ang insidente sa isang electrical fire dakong 3:00 ng hapon.
Ayon sa pamunuan ng Pamantasan, idineklarang kontrolado ang sunog at kalaunan ay tuluyang naapula sa parehong araw.
Upang maseguro ang kaligtasan, agad nag-atas ng suspensiyon ng mga klase sa apektadong gusali.
Samantala, inilinaw ng PUP na hindi kabilang sa suspensiyon ang College of Law, College of Human Kinetics (night classes), Laboratory High School & Senior High School, College of Communication, College of Engineering, Institute of Technology, at M.H. Del Pilar Building.
Walang naiulat na nasaktan sa insidente habang patuloy ang pagtataya ng mga awtoridad upang matukoy ang halaga ng natupok sa sunog.
