Sa Zambales,  
Tindero nagsuko ng mga puslit na yosi

ISANG lokal na tindero ang kusang-loob na nagsuko ng mga hindi binayarang buwis at ipinuslit na sigarilyo sa himpilan ng pulisya sa Sta. Cruz, Zambales nitong Sabado ng tanghali, 25 Abril.

Bunga ito ng pinaigting na kampanya ng Police Community Relations (PCR) personnel at mga intelligence operatives ng Sta. Cruz MPS, na patuloy na nagsasagawa ng information drive hinggil sa mga legal na parusa sa pag-iingat at pagbebenta ng ilegal na sigarilyo.

Ang nasabing indibiduwal, isang 47-anyos residente sa Sta. Cruz, Zambales, ay nagpahayag ng kanyang kahandaang makipagtulungan sa mga awtoridad at kusang isinuko ang mga nasabing kontrabando nang walang pamimilit, pananakot, o puwersa. Ipinapakita ng pangyayaring ito ang pagiging epektibo ng patuloy na ugnayan at pakikipagdiyalogo ng pulisya sa komunidad.

Ayon sa ulat, ang mga isinukong item ay kinabibilangan ng 31 reams ng J&J American Blend na sigarilyo; 43 reams ng Modern na sigarilyo; at 3 reams ng FS na sigarilyo na tinatayang may kabuuang halagang P42,800.

Ang lahat ng mga isinukong produkto ay maayos na tinanggap, naitala, at kasalukuyang nasa kustodiya ng Sta. Cruz MPS para sa wastong accounting at disposisyon, alinsunod sa koordinasyon sa mga kaukulang ahensiya ng pamahalaan.

Patuloy na hinihikayat ng pulisya ang publiko na makiisa sa kampanya laban sa paglaganap ng ilegal na produkto at agad na iulat ang mga kahina-hinalang aktibidad sa kanilang komunidad. (MICKA BAUTISTA)